DG-desk: July 2020

Tuesday, 21 July 2020

💐ગુજ્જુવાણી 💐 વાર્તાસ્પર્ધા વિજેતા 👩એક રાધા એક મત્સ્યા 🐬

આ વાર્તા એક પોર્ટલ ફેન્ટસી થીમ ઉપર આધારિત છે,

જેમાં નાયિકાઓ વાસ્તવિક દુનિયામાંથી કાલ્પનિક વિશ્વમાં પ્રવેશ કરે છે!

--------------

ગુજ્જુવાણી

વાર્તાસ્પર્ધા પરિણામ

----^-----^------^------^-------^------^-------

ગુજરાતી સાહિત્યના પ્રખ્યાત ઓનલાઇન પ્લેટફોર્મ 'ગુજ્જુવાણી' ઉપર 'લોકડાઉન' (એપ્રિલ-મે-૨૦૨૦) દરમ્યાન વિશ્વદીપ બારડ (USA) આયોજિત ટૂંકી વાર્તાસ્પર્ધા અંતર્ગત મારી નવલિકા

'એક રાધા એક મત્સ્યા'

વિજેતા નીવડી છે; પુરસ્કૃત થઈ છે.

---^---^----

વિજેતા કૃતિનાં ચમકારા

---^----^----

‘હું ક્યાં છું?’ બાલ્કનીમાંથી બેડરૂમ તરફ નજર દોડાવતા દેવે પૂછ્યું હોત, જાણે બાલ્કનીને પૂછ્યું હોય.

‘મારી આગોશમાં!’ બેડરૂમની દીવાલને શરમથી તાકતાં મેં કહ્યું હોત, જાણે બાલ્કનીને કહ્યું હોય.

કૂંડામાં ઊગેલાં ફૂલછોડ અમને ચોરીછૂપીથી તાકી રહ્યાં હોત. દેવે એમનાથી છૂપાઈને મોગરાનું ફૂલ મારા વાળમાં ખોંસ્યું હોત. ફૂલ વાળમાં ને સુગંધ આંખમાં રહી ગઈ હોત...

પણ આમાંનું કશું બન્યું નહિ. બાલ્કનીમાં એનાં વાળ ક્યારેય નહિ લહેરાયા. કોફીની ખૂશ્બુ બાલ્કનીની હવામાં ક્યારેય નહિ ફેલાઈ. મોગરાની ખૂશ્બુ એનું કૂંડું છોડીને ક્યારેય હવામાં ભળી નહિ શકી. દરિયાના મોજાંની વાછટ તો બંગલામાં પ્રવેશી ન શકી, પણ ભીનાશ અને ખારાશ આવતાં-જતાં રહેલાં!

દરિયાના ખારાં પાણીમાંથી નીકળીને પેટ ઘસડતી મત્સ્યકન્યા નજીકના એક ખડક ઉપર જઈને બેઠી. અર્ધ સ્ત્રીશરીર, અર્ધ મત્સ્ય...

‘દરિયાની અફાટ સમૃદ્ધિ છોડીને એક મત્સ્યકન્યા ખરબચડી ચટ્ટાન ઉપર..?’ રાધાને લાગ્યું જાણે પોતે પૂછવા માગે છે.

‘જમીન ઉપર જીવવાનું છોડીને એક સૌંદર્યવાન યુવતી ઘૂઘવતા દરિયે..?’ જાણે કે મત્સ્યકન્યા એને જવાબ આપવા માગે છે!

‘થઈ જાય એક વાર જિંદગીની અદલાબદલી?’ કિનારેથી પાછાં વળી રહેલાં મોજાં તરફ જોઈને મત્સ્યકન્યા બોલી. ‘તું ‘હું’ બની જાય અને હું ‘તું’..!’

રાધા ખામોશ રહી. પણ એનાં વિચારોએ ઘૂઘવાટ કર્યો. થોડી ક્ષણો બહારની સ્તબ્ધતામાં પસાર થઈ ગઈ. ‘શું જીવન બદલવું શક્ય છે?’

‘જીવન બદલવું આપણા હાથમાં જ છે!’ મત્સ્યકન્યા અનંત આકાશમાં ચમકતા અસંખ્ય સિતારાઓને જોતાં બોલી. ‘પંદર દિવસ પછી પૂનમની મધરાતે, આ જ ચટ્ટાન ઉપર ફરી મળીશું! ને ફરી તું ‘તું’ અને હું ‘હું’ બની જઈશું... છે મંજૂર?'

Saturday, 18 July 2020

હે રામ * નવચેતન * માર્ચ-૨૦૨૦

હે રામ

---^--^---

નવસારીના એક વિસ્તાર 'ભેસતખાડા'માં આવેલું વર્ષો પુરાણું મંદિર... આમ તો મારા નામનો અર્થ જ ‘ધર્મનો ધણી’ એવો કંઈક થાય, પણ નામ તેવા ગુણ મારામાં અવતર્યા નથી. છતાં, એક સર્જકે પોતાની રચનાના પાત્રમાં ઢળવું હોય તો એ તરફ પણ ઝૂકવું પડે!

તો વાત જાણે એમ છે કે, વાર-તહેવારે ભેસતખાડા જવાનું થાય ત્યારે સ્મરણ થઈ આવતું કે બાળપણમાં ‘પરભુ’ નામના એક મિત્ર સાથે એ મંદિરના પ્રાંગણમાં ગિલ્લીદંડો રમતા. રમીને થાકીએ એટલે મંદિરના સફેદ આરસના ઓટલે બેસતા. પરભુ એની પોટલી (દારૂ)ના પૈસામાંથી ક્યારેક મને બરફ-ગોળો ખવડાવતો. એ પરભુ તો પછી પ્રભુને પ્યારો થઈ ગયેલો પણ મંદિરનું એ પ્રાંગણ ગઈ દિવાળીએ મારા માટે એક વાર્તા લખવાનું પ્રયોજન બની ગયું. અને કલ્પના તથા સંવેદનાના સહારે નવલિકા ‘હે રામ’ રચાઈ!

લખીને ‘નવચેતન’ સામયિકમાં મોકલી, અને બે મહિના પછી કાર્યાલયમાંથી ફોન આવ્યો કે વાર્તા પ્રકાશન માટે સ્વીકારાઈ છે.

ગયા મહિને તંત્રી શ્રી હેમંતભાઈ શાહનો ફોન આવ્યો. નવસારી એમનું આવવાનું થયા કરે છે એ સંદર્ભમાં એમની સાથે સત્તર મિનિટ વાતો થઈ. એમણે એ પણ જણાવ્યું કે મારી આ વાર્તા સંપાદક શ્રી યશવંત દાદા (મહેતા) સાહેબને ખૂબ પસંદ આવી છે અને એમણે વાર્તાના મથાળે પોતાની ટીપ્પણી પણ લખી છે - 'સતયુગના રામ તો ચૌદ વર્ષનો વનવાસ ભોગવીને અને રાવણને સંહારીને અયોધ્યા પાછા આવ્યા; હવે રાવણનાં નહીં, રાક્ષસનાં રાજ છે...'

તો આ સાથે રજૂ કરું છું – ‘નવચેતન’ના અંક માર્ચ-૨૦૨૦માં પ્રકાશિત થયેલી મારી વાર્તા ‘હે રામ’!

----^------^-----

(નવસારી)

#dgfiction #dgprint

Sunday, 12 July 2020

ધ વ્હાઇટ ટાઇગર

'ધ મેન બુકર પ્રાઈઝ વિનર ૨૦૦૮' નવલકથા 'ધ વ્હાઇટ ટાઇગર' : નોકર, ફિલોસોફર, એન્ટરપ્રેન્યોર, ખૂની.

વાત છે સાત રાત્રીઓની...

એક 'ટાઇગર' પોતાનું પાંજરું તોડીને કેવી રીતે ભાગી શકે? નાયક સતત એ વિચાર્યા કરે છે - 'શું એક સફળ માણસ કોઈ નિર્દોષની લાશ પર ચડીને જ ટોચે પહોંચે છે?

વર્ષ ૨૦૦૮માં અંગ્રેજીમાં પ્રકાશિત થયેલ 'ધ વ્હાઇટ ટાઇગર' અરવિંદ અડીગાની પ્રથમ નવલકથા છે, જેનું ગુજરાતી અનુવાદ ડૉ. પ્રશાંત ભીમાણી (સાયકોલોજીસ્ટ)એ ૨૦૧૦માં કર્યું છે.

પ્રિયંકા ચોપરા અને રાજકુમાર રાવ અભિનીત આ જ નામની નેટફ્લિક્સ ફિલ્મ આ નવલકથાનું એડેપ્ટેશન છે.

-------------

ધર્મેશ ગાંધી

Saturday, 11 July 2020

ટ્રેન ટુ કબ્રસ્તાન * મમતા * જુલાઈ-૨૦૨૦

ટ્રેન ટુ કબ્રસ્તાન

------------------

આ વાર્તા આ અંકની અન્ય વાર્તાઓથી અનોખી બની રહે છે. ('મમતા મંડળી', જુલાઈ-૨૦૨૦)

---------

'તારક મહેતા કા ઉલ્ટા ચશ્માં'ના નિર્માતા શ્રી અસિતભાઈ મોદીના હસ્તે પુરસ્કાર તથા પ્રમાણપત્ર પ્રાપ્ત થયેલ

મારી વિજેતા/સન્માનિત કૃતિ 'ટ્રેન ટુ કબ્રસ્તાન'...

માતૃભાષાનાં ગૌરવશાળી દિને અંધેરી-મુંબઈ ખાતે યોજાયેલા અવિનાશ પારેખ તથા 'કોફી મેટ્સ' આયોજિત 'મમતા વાર્તા સ્પર્ધા-૪ (૨૦૧૯-૨૦)'નાં પારિતોષિક વિતરણ સમારોહમાં સાહિત્યકાર શ્રી મધુરાય સાહેબ તથા રંગભૂમિના જાણીતા કસબીઓ સુશ્રી મીનળબેન પટેલ, શ્રી ઉત્કર્ષ મઝુમદાર, શ્રી મનોજ શાહ તથા 'ચિત્રલેખા'વાળા શ્રી ભરતભાઇ ઘેલાણી તેમજ નીલા ટેલિફિલ્મ્સના સર્જક શ્રી અસિતભાઈ મોદીની હાજરી એ આનંદનો અતિરેક!