💐 ત્રિરંગી લેપ 💐 શોપિઝન 'વેનિલા સ્ટોરીઝ સ્પર્ધા' ★ પ્રથમ ક્રમાંકે વિજેતા ★ 'લો-ફેન્ટસી' સ્ટોરી

 ★શોપિઝન 'વેનિલા સ્ટોરીઝ સ્પર્ધા'★

પ્રથમ ક્રમાંકે વિજેતા નિવડેલી મારી 'લો-ફેન્ટસી' સ્ટોરી

 

 

ત્રિરંગી લેપ

---^---^----^-------

પિહૂને આકાશમાં ઉડતા વિમાનની ધણધણાટી સંભળાઈ. ઊંઘમાં જ એણે બંને હાથની મુઠ્ઠી વાળી દીધી. બીજી મિનિટે એણે ધગધગતા શરીર ઉપર ઠંડા પવનની લહેરખી અનુભવી. ભારે થઈ ચૂકેલી પાંપણોને હળવે રહીને ઉઘાડી. સામે હૃદય આકારના લીલાછમ પાંદડાઓનો જાણે કે વરસાદ વરસી રહ્યો હતો. કળતર કરતું શરીર હળવે રહીને પથારીમાં બેઠું થયું. જેવાં એના પગ ફરસ ઉપર મૂકાયા કે શીતળ પાણીનો એક પરિચિત સ્પર્શ થયો. શરદીથી સૂજી ગયેલા નાકમાં ધીમેધીમે માટીની જાણીતી સુગંધ પ્રવેશવા માંડી. બારી બહારનું દ્રશ્ય જોઈને પિહૂનું કમજોર પડી ચૂકેલું શરીર ઝૂમી ઊઠ્યું. નિસ્તેજ ચહેરા ઉપર તેજનું પોતું ફરી વળ્યું. સામે એના મિત્રો ઊભા હતા - કેસરિયો ડુંગર, નૂરી નદી અને પરભુ પીપળો…

 

*

પિહૂ રોજ બહાર રમવા માટે જતી. આજે પ્રકૃતિ સામે ચાલીને એની સાથે રમવા આવી હતી!

કેસરિયો ડુંગર, નૂરી નદી અને પરભુ પીપળો…

*

પિહૂ બીમાર છે. મિત્રોના મોં ઉપર પિહૂથી હંમેશ માટે છૂટા પડી જવાનો વિષાદ છલકાઈ રહ્યો છે. પિહૂ જણાવે છે, 'પપ્પા ગામના સરપંચ છે ને! સારા વૈધને તેડાવીને એનો ઈલાજ કરાવશે...'

વૈદ્યરાજ પિહૂની અસાધ્ય બીમારીનો ઉપાય સૂચવે છે - ત્રિરંગી લેપ...

*

 

पहाड़, टीले, चट्टानें, तालाब

असंख्य पेड़ खेत

कभी नहीं आयेंगे मेरे घर

खेत खलिहानों जैसे लोगों से मिलने

गाँव-गाँव, जंगल-गलियाँ जाऊँगा।

શ્રી વિનોદકુમાર શુક્લજીની કવિતા

‘જો મેરે ઘર કભી નહીં આયેંગે’ની ઉપરોક્ત પંક્તિઓ માનવીય સંવેદનાનો પૃકૃતિ સાથેનો સુમેળ દર્શાવે છે.

પણ... ધારો કે… વૃક્ષ, નદી અને ડુંગર એક દિવસ તમને મળવા તમારા ઘરે પધારે તો..?

*

આખી વાર્તા વાંચો @

Shopizen App

ત્રિરંગી લેપ

https://shopizen.page.link/XfCT

*

વાર્તાની લિંક સાથે, આ વાર્તા માટે મળેલ ભાવક-મિત્રોના ઉત્સાહજનક પ્રતિભાવો પણ સામેલ કર્યા છે.

 

 

દરેક સ્પર્ધક, વિજેતામિત્રો, ઉમંગભાઈ તેમજ ટીમ-શોપિઝનનો હૃદયપૂર્વક આભાર.

-----^----^-----

© ધર્મેશ ગાંધી

(નવસારી) 23.11.20

----*---*----*----

મારી આ વિજેતા કૃતિ મારી માનેલી/ધર્મની બહેન રૂબીની ઢીંગલી જેવી દીકરી રૂવાને અર્પણ કરું છું.

ડિયર અનુભૂતિ 😊 'જલારામદીપ' દીપોત્સવી અંક 😊 ઓક્ટોબર-૨૦૨૦

દિવાળી આવી ને વાર્તા લાવી!

ડિયર અનુભૂતિ

-------^------^--------

૩૮ વર્ષની વયે પહોંચેલા સામયિક 'જલારામદીપ'ના

દીપોત્સવી અંક (ઓક્ટોબર-૨૦૨૦)માં મારી વાર્તા

'ડિયર અનુભૂતિ'...

 

*

કુમારિકાથી પરિણીતા બનવા સુધીની સફર દરમ્યાનના અલગ અલગ તબક્કે એક યુવતીને થતી અલગ અલગ અનુભૂતિની કહાણી...

*

આજે હું આખરી વખત એને વળગી પડી હતી. એમ પણ છેલ્લી ઘણી મુલાકાતો મેં આખરી હોવાની અનુભૂતિથી જ એની સાથે ગાળી છે. અત્યારે પણ મને એ આલિંગન મહેસૂસ થાય છે. હું એને જાણે હંમેશ માટે પોતાનામાં સમાવી લેવા માગતી હોઉં એમ કસીને વળગી પડું છું. એના હુંફાળા શ્વાસ મારા કાનમાં ધગધગતા પડઘા પાડે એટલું કસીને, મારા હદયના ધબકારા એની ધડકનોમાં ઓગળી જાય એટલું કસીને, હું એનું આલિંગન માણું છું. મારી બંધ પાંપણો ઉઘડે છે. દૂર સુધી નજર ફેલાય છે - ક્ષિતિજ તરફ... હું જોઉં છું ધરતી-આકાશ એકબીજાની આગોશમાં છે. પણ એ તો એક વહેમ છે ને! બંને વચ્ચે તો અમાપ અંતર છે - બિલકુલ મીરા-મલ્હાર વચ્ચે છે એવું! હું મલ્હારથી અળગી થઈને મારાં નવાં રચાઈ રહેલાં જગત તરફ દોટ મૂકું છું. અરે, હું તો અહીં છું! પણ, મને ખાતરી છે કે મલ્હાર મને ક્ષિતિજમાં વિલીન થતી તાકી રહ્યો હશે. પાછળ ફરીને હું જોતી નથી; જોઈ શકતી નથી... કદાચ, જોવા માગતી નથી!

Read more...

-------^------^------^-------

© ધર્મેશ ગાંધી (નવસારી)

20.10.20

#DGfiction #DGprint

-----------------

 

 

 

 

પ્રસ્તુત વાર્તા મિત્ર-એડિટર

Soniya Thakkar

ને અર્પણ કરતાં સાહિત્યિક આનંદની અનુભૂતિ થાય છે. 'જલારામદીપ'માં પ્રકાશિત કરવા બદલ શ્રી

Satish Danak

સાહેબનો ખૂબ ખૂબ આભાર.

-----^----^-----

 

Unfinished - PC

 

Unfinished

-------------

...અને તેથી, તમે જે નથી જોયું એ દરમ્યાનના સમયગાળામાં હું કઈ રીતે 'હું' બની એ અંગે ચોક્કસપણે તમે સમજી શકશો.

ત્યારે હું એ પણ આશા રાખું છું કે તમે એક વિશ્વાસ સાથે આગળ વધશો, એ જાણીને કે, એ બાબત બરાબર જ છે કે, જિંદગીના નિર્ણયો લેતી વખતે અમુકની પસંદગી કરવી, અમુક વસ્તુઓ છોડી દેવી અને અમુક બાબતો અપૂર્ણ રાખવી પડતી હોય છે.

તમારા ત્યાર પછીના ગંતવ્ય (મંજિલ) તરફ પહોંચવાની સફર માટે શું આવશ્યક છે એ જાણીને તમે એ તરફ આગળ વધી જશો. આપણાં બધાં પાસે, કહેવા માટે, અલગ અલગ વાર્તા હોય છે.

આ મારી વાર્તા છે, એન્ડ આઇ એમ Unfinished…

 

***

આ શબ્દો, ૩૮ વર્ષીય ભારતીય અભિનેત્રી, મિસ વર્લ્ડ (૨૦૦૦), અને નેશનલ ફિલ્મ એવૉર્ડ વિનર, પ્રિયંકા ચોપરા જોનાસનાં છે.

ખાસ વાત - એમનાં પુસ્તક 'Unfinished - A Memoir' એ પ્રિ-ઓર્ડર લોન્ચના ૧૨ કલાકમાં જ અમેરિકામાં નંબર ૧, અને ૨૪ કલાકમાં ઓવરઓલ 'બેસ્ટસેલર'ની સિદ્ધિ હાંસલ કરી લીધી છે.

ગ્રેટ ઇન્ડિયન! ગ્રેટ લેડી! ગ્રેટ અચિવમેન્ટ!

(પુસ્તકની અધધ કિંમત: 28 USD - 2000 Rs.

જાન્યુ-2021માં રિલીઝ થશે.)

 

PC નાં જણાવ્યા અનુસાર, મિસ વર્લ્ડથી લઈને હોલીવુડ સુધીની પોતાની સફરના સંભારણા એમાં પ્રામાણિકતા અને મસ્તીથી ભર્યાં આલેખાયાં છે જે લોકો માટે પ્રેરણાદાયી સાબિત થશે, ખાસ કરીને મહિલાઓ માટે, સંઘર્ષ કરતી દરેક યુવતીઓ માટે...

જો તમે સુવિખ્યાત હોવ તો સફળતા મળવાની તકો આપોઆપ વધી જાય છે. કહેવાયું છેને, કામ એવું કરો કે નામ થઈ જાય; અને નામ એવું કરો કે નામ પડતાં જ કામ થઈ જાય!

જાણીતી ઉક્તિ મુજબ, આપણે કહેતાં રહીએ છીએ કે, બસ એક તક મળે તો હું સેંકડો સિદ્ધિઓ હાંસલ કરીને દેખાડી દઈશ. પણ, સામે એ પણ કહેવાય છે - એક સિદ્ધિ તો હાંસલ કરો, તક તો પછી સેંકડો ઊભી થઈ જશે!

હવે એ દરેકના પુરુષાર્થ તથા પ્રારબ્ધ ઉપર આધાર રાખે છે કે એમને પહેલાં તક મળે છે કે સિદ્ધિ!

---------------

ધર્મેશ ગાંધી

નવસારી 4.10.20

----------------

 

Courtesy: PC Instagram a/c:

https://www.instagram.com/p/CF14sBqnl7R/?igshid=21g3f0a2a9op

ફેસ ઓફ ફેઇલ્યોર (Anushka-Kohli Vs Gavaskar)

 ફેસ ઓફ ફેઇલ્યોર

-----------------------

સેલીબ્રીટી બનવું સહેલું નથી. તમે જે ક્ષણથી સફળતાની સીડી ચઢવાનું શરૂ કરો છો એ જ ક્ષણથી તમે તમારી સાથે બે પ્રકારના ‘લગેજ’ લઈને એ સફર આદરો છો. એક બેગમાં તમારા સમર્થકો હોય છે તો પીઠ પાછળ લટકી રહેનારી બેકપેકમાં તમારા વિરોધીઓ... એ બાય ડીફોલ્ટ હોય છે; તમારી ચોઇસ હોય કે ન હોય; હંમેશા સાથે રહેનારા; તમારી દરેક હિલચાલ ઉપર નજર રાખનારા...

તમે કોહલી હોવ કે ધોની, અમિતાભ હોવ કે પ્રિયંકા, સકસેસ અને ફેઇલ્યોર તો દિવસ-રાતના ચક્રની જેમ એક પછી એક તમારી લાઇફ અને કેરિયરમાં આવતાં જ રહે છે. પણ ડગલે ને પગલે તમને મૂલવવાવાળા જયારે ભાન ભૂલીને કમેન્ટ કરે ત્યારે એ શોભાસ્પદ નથી લાગતું.

 

આઇ.પી.એલ.ની એક મેચમાં કોહલીએ ફિલ્ડર તરીકે બે કેચ ડ્રોપ કર્યા અને બેટિંગમાં પણ નિષ્ફળ રહ્યો. થાય એ તો... પરફોર્મન્સ તો કથળેલું જ ગણાય. એગ્રી. પણ હદ તો ત્યારે થાય જયારે ક્રિકેટના લીજેન્ડરી ગણાતા ગવાસ્કર સાહેબ એ બાબતે સાવ કથળેલી કક્ષાની કમેન્ટ કરે. લોક્ડાઉન દરમ્યાન કોહલી-અનુષ્કાએ ક્રિકેટ રમતાં હોય એવો એક મસ્તીભર્યો-મઝાનો વિડિયો અપલોડ કર્યો. ને સર ગાવસ્કરે કોહલીની નિષ્ફળતાનો રેફરન્સ એ વિડિયોમાં શોધી કાઢ્યો. સો ટેલેન્ટેડ! (બાપુ રમતા રમતા પર્સનલ લાઇફ સુધી પહોંચી ગયા... એમ તો રોહને પણ ક્રિકેટમાં શું ઉકાળ્યું હતું એ તો આખું જગ જાણે છે.) ગાવસ્કર ઉવાચ, ‘અબ જો લોક્ડાઉન થા, તો સિર્ફ અનુષ્કા કી બોલિંગ કી પ્રેક્ટીસ કી ઉન્હોંને, વો દિખા વિડિયો મેં, ઉસસે તો કુછ નહિ બનના હૈ.’ (આ સ્ટેટમેન્ટના ઘણા અર્થ નીકળી શકે. અનુષ્કાનો બેબી-બંપ (પ્રેગ્નન્ટ) ફોટો પણ શેર થયો હતો, જે ખરેખર તો શુભ સમાચાર જ ગણાય.)

જોકે અનુષ્કા શર્માએ પણ સણસણતો પ્રત્યુત્તર આપ્યો, જેનો સારાંશ કંઈક આવો છે - ‘મિ. ગાવસ્કર, આપની કમેન્ટ અણછાજતી છે. પતિની રમત/નિષ્ફળતા અંગે ક્યાં સુધી પત્નીને દોષ દેતા રહેશો? મને ક્રિકેટમાં ઢસડતા રહેવાનું ક્યારે બંધ કરાશે?’

ઘણી વખત તમારા જમાનામાં તમને તમારી સફળતા બદલ ઓછો શ્રેય મળ્યો હોય, અને આજના જમાનામાં અઢળક ફેઇમ/મની મળતાં હોય તો એનીયે બળતરા આવા સમયે આવા લીજન્ડોના મસ્તિષ્કમાં ઊભરી આવે ખરી. (દરેક ક્ષેત્રમાં)

ને તાજા સમાચાર મુજબ ગઈ કાલની મેચની સુપર ઓવરના લાસ્ટ બોલે બાઉન્ડ્રી ફટકારીને કોહલીએ MI સામે પોતાની ટીમને વિજય અપાવ્યો. કોઈની રમતનું વિશ્લેષણ કરવું યોગ્ય જ છે, પણ એ ક્ષેત્રની ગરિમા જાળવવાનું ચૂકી જવાય ત્યારે..? 

 

અહીં ભોગ બનનારે એટલું જ કરવાનું, તમારા વિરોધીઓ જ્યારે છાપરે ચઢીને તમારી વિરુદ્ધ ટીકાઓ કરે ત્યારે તમારે પણ એમની સાથે છાપરે નથી ચઢી જવાનું. તમારે તો નીચે જ રહેવાનું છે; પોતાના લક્ષ્ય ઉપર ફોકસ રાખવાનું છે. પુરુષાર્થ એવો કરો કે તમારું કામ પછી એ જ છાપરે ચઢીને તમારું નામ પોકારે. સફળતાની એ ગૂંજમાં વિઘ્નસંતોષીઓના ઝેર ઓકતા નિવેદનો આપોઆપ રૂંધાઈ ઊઠશે. એ જ તમારી ખરી જીત છે. તમે ખામોશ રહો. તમારી ટીકાઓનો જવાબ તમારા 'કામ' (પરફોર્મન્સ)ને આપવા દો.

આશા રાખીએ, કોહલી પુરુષાર્થના બળે આવા 'માસ્ટરો'ને ખામોશ કરે!

-------------

ધર્મેશ ગાંધી

29.9.20

ANITA * ‘અનિતા’ને ઓળખો છો?

 ANITA

---^---

‘અનિતા’ને ઓળખો છો? તેના કારનામાં જાણો છો?

‘અનિતા’ – ANITA - અંગ્રેજી ઉચ્ચારણ મુજબ ‘એનીટા’...

એન્ટાર્કટિક ઇમ્પલસિવ ટ્રાંસિએન્ટ એન્ટેના (Antarctic Impulsive Transient Antenna - ANITA)

 

*

અમેરિકાની અવકાશી સંસ્થા – 'NASA'એ ‘સમાંતર બ્રહ્માંડ’ (પેરેલલ યુનિવર્સ) શોધી કાઢ્યું છે. આપણા બ્રહ્માંડની નજીકમાં એક બીજું બ્રહ્માંડ અસ્તિત્વ ધરાવે છે. પરંતુ, અહીં સમય ઊલટો ચાલે છે. નાસાના વૈજ્ઞાનિકો દ્વારા આ અંગે એન્ટાર્કટિકામાં એક સંશોધન કરવામાં આવ્યું હતું.

*

‘એનિટા’ને એક વિશાળ બલૂનથી એવી ઊંચાઈએ લઈ જવામાં આવ્યું હતું જ્યાં હવા શુષ્ક હતી, કોઈ રેડિયો અવાજ ન હતા. ઉચ્ચ ઊર્જાના કણો બાહ્ય અવકાશથી પૃથ્વી પર આવતા રહેતા, જે અહીં કરતાં અનેક મિલિયન ગણા વધારે શક્તિશાળી હોય છે. એવા કણો જેનું વજન શૂન્યની નજીક હોય છે. તેઓ કોઈ પણ કણો સાથે ટકરાયા વિના પૃથ્વીમાંથી પસાર થાય છે. પરંતુ ઉચ્ચ ઉર્જાના કણો પૃથ્વીના નક્કર પદાર્થ સાથે ટકરાતા અટકી જાય છે. ANITA દ્વારા અંતરિક્ષ તરફ એવા ન્યુટ્રીનોસ મળી આવ્યા હતા, જે પૃથ્વીથી ઉપર તરફ આવતા હતા. એટલે કે, આ કણો સમયમાં પાછળની તરફ ચાલી રહ્યા છે. જે સમાંતર બ્રહ્માંડના સિદ્ધાંતને યોગ્ય ઠેરવે છે.

*

એ અહેવાલ મુજબ, 13.8 અબજ વર્ષો પહેલા બિંગ-બેંગના સમય દરમિયાન બે બ્રહ્માંડની રચના થઈ હતી. એક, જેમાં આપણે જીવીએ છીએ. બીજું, એક એવું બ્રહ્માંડ છે જે હાલના સમય કરતાં પાછળની તરફ જઈ રહ્યું છે. જ્યાં સમય ઊંધો ચાલે છે. જોકે વૈજ્ઞાનિકોમાં નવા બ્રહ્માંડની થીયરી અંગે મતમતાંતર પ્રવર્તે છે.

------------

ધર્મેશ ગાંધી

(Courtesy : NASA Report & Images)

#MySciFiProject

#ParallelUniverse

#DGfiction

 

આજે દેશનો 74મો સ્વાતંત્ર્ય દિવસ.

 

આજે દેશનો 74મો સ્વાતંત્ર્ય દિવસ.

ઘણાંને થતું હશે કે 1947 થી લઈને 2020 સુધીની ગણતરી કરીએ તો વર્ષ તો 73 જ થાય. તો પછી 74મો કઈ રીતે?

(મને અમુક વિદ્યાર્થીઓ પ્રશ્ન કરતા...)

ધારો કે,

15 ઓગસ્ટ 1947ના દિવસે કોઈક વ્યક્તિનો જન્મ થયો હોય તો આજે એટલે કે 15 ઓગસ્ટ 2020ના રોજ એ વ્યક્તિનો 73મો જન્મદિવસ ગણાય. મતલબ એ વ્યક્તિના 73 વર્ષ પૂર્ણ થયા. (74મું તો હજી બેઠું.)

બીજું, ધારો કે ,

કોઈક વ્યક્તિનો જન્મ આજે (15.8.20) થયો. હવે એ વ્યક્તિ આવતે વર્ષે 15.8.21 ના રોજ પ્રથમ જન્મદિવસ ઉજવશે. પણ જો દેશ આજે જ આઝાદ થયો હોત તો આપણે આવતે વર્ષે બીજો (2nd) સ્વાતંત્ર્ય દિવસ ઉજવતા હોત.

સ્વાતંત્ર્ય દિવસની ગણ્તરીમાં થોડું અલગ લોજીક છે. જે દિવસે દેશને આઝાદી મળી (15.8.47) એ દિવસ જ દેશનો પ્રથમ સ્વાતંત્ર્ય દિવસ બની ગયો કહેવાય! એ રીતની ગણતરીમાં 1947 અને 2020 એ બંને વર્ષો ધ્યાનમાં લેવાય.

આમ, આઝાદી મળ્યાને વર્ષ તો 73 જ પૂર્ણ થયા, પરંતુ સ્વાતંત્ર્ય દિવસ 74મો ગણાય!

----------

ધર્મેશ ગાંધી

નવસારી

15.8.20

 

💐ગુજ્જુવાણી 💐 વાર્તાસ્પર્ધા વિજેતા 👩એક રાધા એક મત્સ્યા 🐬

 આ વાર્તા એક પોર્ટલ ફેન્ટસી થીમ ઉપર આધારિત છે,

જેમાં નાયિકાઓ વાસ્તવિક દુનિયામાંથી કાલ્પનિક વિશ્વમાં પ્રવેશ કરે છે!

--------------

ગુજ્જુવાણી વાર્તાસ્પર્ધા પરિણામ

----^-----^------^------^-------^------^-------

ગુજરાતી સાહિત્યના પ્રખ્યાત ઓનલાઇન પ્લેટફોર્મ 'ગુજ્જુવાણી' ઉપર 'લોકડાઉન' (એપ્રિલ-મે-૨૦૨૦) દરમ્યાન વિશ્વદીપ બારડ (USA) આયોજિત ટૂંકી વાર્તાસ્પર્ધા અંતર્ગત મારી નવલિકા 'એક રાધા એક મત્સ્યા' વિજેતા નીવડી છે; પુરસ્કૃત થઈ છે.

---^---^----

વિજેતા કૃતિનાં ચમકારા

---^----^----

‘હું ક્યાં છું?’ બાલ્કનીમાંથી બેડરૂમ તરફ નજર દોડાવતા દેવે પૂછ્યું હોત, જાણે બાલ્કનીને પૂછ્યું હોય.

‘મારી આગોશમાં!’ બેડરૂમની દીવાલને શરમથી તાકતાં મેં કહ્યું હોત, જાણે બાલ્કનીને કહ્યું હોય.

કૂંડામાં ઊગેલાં ફૂલછોડ અમને ચોરીછૂપીથી તાકી રહ્યાં હોત. દેવે એમનાથી છૂપાઈને મોગરાનું ફૂલ મારા વાળમાં ખોંસ્યું હોત. ફૂલ વાળમાં ને સુગંધ આંખમાં રહી ગઈ હોત...

પણ આમાંનું કશું બન્યું નહિ. બાલ્કનીમાં એનાં વાળ ક્યારેય નહિ લહેરાયા. કોફીની ખૂશ્બુ બાલ્કનીની હવામાં ક્યારેય નહિ ફેલાઈ. મોગરાની ખૂશ્બુ એનું કૂંડું છોડીને ક્યારેય હવામાં ભળી નહિ શકી. દરિયાના મોજાંની વાછટ તો બંગલામાં પ્રવેશી ન શકી, પણ ભીનાશ અને ખારાશ આવતાં-જતાં રહેલાં!

*

દરિયાના ખારાં પાણીમાંથી નીકળીને પેટ ઘસડતી મત્સ્યકન્યા નજીકના એક ખડક ઉપર જઈને બેઠી. અર્ધ સ્ત્રીશરીર, અર્ધ મત્સ્ય...

*

‘દરિયાની અફાટ સમૃદ્ધિ છોડીને એક મત્સ્યકન્યા ખરબચડી ચટ્ટાન ઉપર..?’ રાધાને લાગ્યું જાણે પોતે પૂછવા માગે છે.

‘જમીન ઉપર જીવવાનું છોડીને એક સૌંદર્યવાન યુવતી ઘૂઘવતા દરિયે..?’ જાણે કે મત્સ્યકન્યા એને જવાબ આપવા માગે છે!

*

‘થઈ જાય એક વાર જિંદગીની અદલાબદલી?’ કિનારેથી પાછાં વળી રહેલાં મોજાં તરફ જોઈને મત્સ્યકન્યા બોલી. ‘તું ‘હું’ બની જાય અને હું ‘તું’..!’

રાધા ખામોશ રહી. પણ એનાં વિચારોએ ઘૂઘવાટ કર્યો. થોડી ક્ષણો બહારની સ્તબ્ધતામાં પસાર થઈ ગઈ. ‘શું જીવન બદલવું શક્ય છે?’

‘જીવન બદલવું આપણા હાથમાં જ છે!’ મત્સ્યકન્યા અનંત આકાશમાં ચમકતા અસંખ્ય સિતારાઓને જોતાં બોલી. ‘પંદર દિવસ પછી પૂનમની મધરાતે, આ જ ચટ્ટાન ઉપર ફરી મળીશું! ને ફરી તું ‘તું’ અને હું ‘હું’ બની જઈશું... છે મંજૂર?'

*

Read more... On GujjuVaani App...

----------------

© ધર્મેશ ગાંધી

નવસારી

#DGfiction #DGprize #DGcontest

-------

સરસ આયોજન બદલ

Priya Thakkar

નો તેમજ એડિટર

Soniya Thakkar

નો ખૂબ ખૂબ આભાર!

Story Link-

https://play.google.com/store/apps/details...

 

 

હે રામ * નવચેતન * માર્ચ-૨૦૨૦

 હે રામ

---^--^---

નવસારીના એક વિસ્તાર 'ભેસતખાડા'માં આવેલું વર્ષો પુરાણું મંદિર... આમ તો મારા નામનો અર્થ જ ‘ધર્મનો ધણી’ એવો કંઈક થાય, પણ નામ તેવા ગુણ મારામાં અવતર્યા નથી. છતાં, એક સર્જકે પોતાની રચનાના પાત્રમાં ઢળવું હોય તો એ તરફ પણ ઝૂકવું પડે!

 

તો વાત જાણે એમ છે કે, વાર-તહેવારે ભેસતખાડા જવાનું થાય ત્યારે સ્મરણ થઈ આવતું કે બાળપણમાં ‘પરભુ’ નામના એક મિત્ર સાથે એ મંદિરના પ્રાંગણમાં ગિલ્લીદંડો રમતા. રમીને થાકીએ એટલે મંદિરના સફેદ આરસના ઓટલે બેસતા. પરભુ એની પોટલી (દારૂ)ના પૈસામાંથી ક્યારેક મને બરફ-ગોળો ખવડાવતો. એ પરભુ તો પછી પ્રભુને પ્યારો થઈ ગયેલો પણ મંદિરનું એ પ્રાંગણ ગઈ દિવાળીએ મારા માટે એક વાર્તા લખવાનું પ્રયોજન બની ગયું. અને કલ્પના તથા સંવેદનાના સહારે નવલિકા ‘હે રામ’ રચાઈ!

લખીને ‘નવચેતન’ સામયિકમાં મોકલી, અને બે મહિના પછી કાર્યાલયમાંથી ફોન આવ્યો કે વાર્તા પ્રકાશન માટે સ્વીકારાઈ છે.

 

ગયા મહિને તંત્રી શ્રી હેમંતભાઈ શાહનો ફોન આવ્યો. નવસારી એમનું આવવાનું થયા કરે છે એ સંદર્ભમાં એમની સાથે સત્તર મિનિટ વાતો થઈ. એમણે એ પણ જણાવ્યું કે મારી આ વાર્તા સંપાદક શ્રી યશવંત દાદા (મહેતા) સાહેબને ખૂબ પસંદ આવી છે અને એમણે વાર્તાના મથાળે પોતાની ટીપ્પણી પણ લખી છે - 'સતયુગના રામ તો ચૌદ વર્ષનો વનવાસ ભોગવીને અને રાવણને સંહારીને અયોધ્યા પાછા આવ્યા; હવે રાવણનાં નહીં, રાક્ષસનાં રાજ છે...'

તો આ સાથે રજૂ કરું છું – ‘નવચેતન’ના અંક માર્ચ-૨૦૨૦માં પ્રકાશિત થયેલી મારી વાર્તા ‘હે રામ’!

----^------^-----

© ધર્મેશ ગાંધી

(નવસારી)

#dgfiction #dgprint