'બ્લોક' - સાઇકો-થ્રિલર સ્ટોરી...
---*---*---
બ્લોક–૪
---^---^---
એને વેદનાથી બૂમો પાડવાનું મન થઈ આવ્યું – હા, મને નફરત છે, મારા પિતા પ્રત્યે પણ... એની નજર સામે પિતાનો કમજોર પડી ચૂકેલો, હિંમત હારી ગયેલો ચહેરો તરવરી ઊઠ્યો. નાસીપાસ થઈ ચૂકેલા પિતાનો પંખા સાથે લટકતો લાચાર મૃતદેહ એ ક્યારેય ભૂલી શકે એમ ન હતો!
એણે જોયું, નિહારિકાએ ફરી પાછા ડાયરી-પેન બાજુએ હડસેલી દીધાં છે. માથે હાથ દઈને બેઠેલી નિહારિકા જાણે કે સાઇકોને અકળાવી રહી હતી. નિહારીકાએ પોતાના સૂકા હોઠ ઉપર જીભ ફેરવી. બરછટ થઈ રહેલા ગળા ઉપર હાથ ફેરવ્યો. સૂકી ખાંસી ખાધી. ઓચિંતી જ એ ઊભી થઈ ગઈ. ફરી એક વાર ફ્રીઝમાંથી કાચની એ બોટલ ખેંચી કાઢી જેનથી એની તરસ મટી શકે એમ હતી. બોટલમાં રહેલા લાલ દ્રવ્યને જોઈને એનાં હોઠ કંપવા લાગ્યા. હૃદય થડકારો અનુભવી રહ્યું. રક્ત જેવી રતાશમાં એ પોતે જ ડૂબી રહી હોવાનું અનુભવી રહી. એણે સખતાઈથી બંને આંખો મીંચી દીધી. થોડા દિવસોથી જ તો આ વમળમાંથી છૂટીને એ બહાર ફંગોળાઈ હતી. હવે ફરી એ જ લાલાશમાં કેદ થવાનું..?
નિહારિકાએ દાંત કચકચાવ્યા. મુઠ્ઠી ભીંસી. આખરે સામેની દીવાલ તરફ એ આખરી બોટલનો પણ ઘા કરી દીધો. બીજી જ ક્ષણે ટુકડાઓમાં વિભાજીત થઈ ગયેલી કાચની બોટલ તથા લાલ પ્રવાહીના રેલાથી આખી દીવાલ જાણે કે લોહિયાળ બની ઊઠી. એની નજર સમક્ષ દીવાલ ઉપરથી નીતરતા તાજા લોહીના રેલા તરવરી ઊઠ્યા... લાલચટક લોહીના એ રેલામાં કપાળે બંને હાથ દાબીને ફસડાઈ પડેલી નિહારિકા એની સમક્ષ તરવરી ઊઠી. અને એ લોહિયાળ દીવાલ સાથે એને પોતાને પણ લોહી નીગળતી હાલતમાં સદાને માટે છોડીને જઈ ચૂકેલા પતિના પગલાં એની નજર સામે તરવરી ઊઠ્યા...
અતીતમાં ગડથોલાં ખાઈને પાછી ફરેલી નિહારિકાએ સ્વસ્થ થઈને લેપટોપ ખોલ્યું અને વિડિયો-ચેટ ‘ઓન’ કર્યું...
‘આ નિષ્ક્રિયતા એ ફક્ત એક ‘ટેમ્પરરી’ અવસ્થા છે, નિહારિકા...’ સામેથી અવાજ આવ્યો.
નિહારિકા માથે હાથ દઈને સાંભળતી રહી.
‘જાણે કે સદંતર બધું ‘બ્લોક’ થઈ જવું...’ લેપટોપના કેમેરામાંથી ડૉ. માનસીનો અવાજ ગૂંજી રહ્યો હતો, ‘મસ્તિષ્ક ધુમ્મસભર્યું લાગવું... માનસિક તાણ અનુભવાવો... આ અવસ્થા ‘રાઇટર્સ બ્લોક’ છે. આવી હાલતમાં લેખક માટે કંઈ પણ લખવું-વિચારવું જાણે કે સાવ મુશ્કેલ થઈ પડે! દરેક લેખકના જીવનમાં ક્યારેક ને ક્યારેક આવો તબક્કો આવતો જ હોય છે, ડિયર! તારો આ તબક્કો લાંબો ચાલ્યો, નિહારિકા, ખૂબ જ લાંબો...’
---^---^---
(ક્રમશઃ)
© ધર્મેશ ગાંધી
--^---^---^----^---
No comments:
Post a Comment